இலங்கையின் முக்கிய சுற்றுலாத் தலங்களான பதுளை, பண்டாரவளை மற்றும் எல்ல ஆகிய பகுதிகளில் Uber Eats தனது உணவு விநியோக சேவையை ஆரம்பித்துள்ளது.
இலங்கை தேயிலை மற்றும் எல்ல பகுதியில் அமைந்துள்ள பிரபலமான Nine Arch Bridge உள்ளிட்ட சுற்றுலா தலங்களுக்குப் பெயர்பெற்ற இந்தப் பகுதிகளில், உள்ளூர் மக்களும் சுற்றுலாப் பயணிகளும் பல்வேறு உணவகங்களில் இருந்து உணவுகளைத் தங்கள் இருப்பிடத்திற்கே ஆர்டர் செய்து பெற்றுக்கொள்ளும் வசதி தற்போது கிடைத்துள்ளது.
சோறு மற்றும் கறி, சிற்றுண்டிகள், காலை உணவு மற்றும் பானங்கள் உள்ளிட்ட பல்வேறு உணவுப் பொருட்களை Uber Eats ஊடாக ஆர்டர் செய்ய முடியும் என தெரிவிக்கப்பட்டுள்ளது.
நுவரெலியா மற்றும் இரத்தினபுரியைத் தொடர்ந்து, இந்த ஆண்டில் Uber Eats தனது சேவையை விரிவுபடுத்தும் மூன்றாவது மாவட்டமாக பதுளை மாவட்டம் அமைந்துள்ளது.
குறிப்பாக, இலங்கையின் பிரபலமான சுற்றுலாத் தலங்களில் ஒன்றான எல்ல பகுதியில் உள்நாட்டு மற்றும் வெளிநாட்டு சுற்றுலாப் பயணிகளுக்கு உணவு தொடர்பான கூடுதல் தெரிவுகளையும் வசதியையும் இந்தச் சேவை வழங்கும் என எதிர்பார்க்கப்படுகிறது.
அதேவேளை, உள்ளூர் உணவகங்களுக்கு தங்களது உணவுகளை அதிகளவிலான வாடிக்கையாளர்களிடம் கொண்டு சேர்ப்பதற்கான வாய்ப்பையும் இந்த சேவை ஏற்படுத்தும் என தெரிவிக்கப்பட்டுள்ளது.
